Hiti og sviti

MYNDIRNAR KOMNAR INN við þessa færslu. 

Í morgun þá fórum við á Local markaðinn hér í Gvatemala city. Þetta var bæði túristamarkaður og grænmetismarkaður fyrir heimamenn. Markaðurinn var mjög snyrtilegur í niðurgröfnu verslunarhúsi í miðborginni. Þar var mikið um textílvörur, leðurvörur og allskonar litskrúðugar töskur og dót. Ég er nú ekkert að missa mig alveg á þessum markaði en ég mun fara aftur þegar við komum til baka og kaupa meira en þarna er hægt að kaupa fallega dúka og einhverjar grímur.

Þarna var líka local grænmetismarkaður sem var áhugaverður með ýmsum tegundum af ávöxtum. Við gerðum þau agalegu mistök að fara á salernið þarna þar sem ein stelpa í hópnum sagði að klósetið væri "mjög fínt"... Við hvað hún var að miða veit enginn því þetta var fullkomlega ógeðslegt en auðvitað bjóst maður svo sem ekki við öðru og við þurftum að kaupa fimm blöð af kósetpappír á mann áður en við fórum inn...

Eftir markaðinn tók við hangs og trjáskoðun á umferðareyjum.. Fyndin þessi umferðareyjublómaskoðun eða trjáskoðun.. Hávaðinn er svo mikill að maður heyrir ekki neitt og svo var orðið frekar heitt, sveitt og þreytt þarna eftir hádegi.  Eftir það var farið í danska sendiráðið til að hlýða á fyrirlestur um stjórnarástandið í Gvatemala en það var áhugaverður fyrirlestur og þarna var vel tekið á móti okkur. Niðurstaðan er sú að það er mjög stjórnlaust í Gvatemala og um 6000 manns eru myrtir á ári bara svona út í bláinn... Þetta er með hættulegri borgum þótt víðar væri leitað.

Í sendiráðinu fengum við hefðbundinn Gvatemalískan mat sem var innbakað fuglakjöt.. Okkur fannst það nú heldur dúbíus matur en létum okkur hafa það.. Og í desert var steiktur banani sem var svo húðaður með sykri.. Þetta leit hins vegar út fyrir að vera hundaskítur sem hafði verið rullað upp úr sykri.. Ekki geðslegt að sjá en var hins vegar mjög bragðgóður.

Eftir ferð í Mollið sem er í kjallara hótelsins til að kaupa úr þar sem við erum búnar að vera í algerri tímaleysu hér þá borðuðum við á hótelinu með Allan og svo komu sænsku stelpurnar tvær. Ég var eitthvað þreytt svo ég tók hvert hláturkastið á fætur öðru og hló og hló og hló.. þannig að tárin láku niður kinnarnar á mér.. Ég man síðast eftir svona hláturkasti hjá mér einmitt á hótelveitingastað í Kenya fyrir ansi mörgum árum... Það er eitthvað í loftinu í þessum heitu löndum.. En allavega það sem kom af stað síðasta hláturkastinu var að Allan spurði hvaða súpa væri og ég sagði aspas.. Og hann virtist ekki skilja aspas svo ég sagði bara aspas aftur með nokkrum tilbrigðum enda kunni ég ekki annað orð yfir það.. En þá spyr Allan " Does it swim?"  Ég hélt ég yrði ekki eldri.. Hann sum sé vissi auðvitað ekki að ég var að tala um grænmeti.. Hélt þetta væri kannski kræklingur .......

Þrátt fyrir svolítið stjórnleysi í skipulagningunni á ferðinni þá er þetta óskaplega gaman og mikið ævintýr að sjá borgina og skoða plönturnar hér..

Bestu kveðjur frá Gvatemala city...

Athugasemdir

[Gerður Bjarnadóttir (IP-tala skráð) 9.1.2008 kl. 22:06]

Hæ Hæ

 Rosalega er gaman að sjá myndirnar og ferðasöguna.  Sykurhúðaði bananinn hljómaði ekki vel, sérstaklega ef hann leit út eins og hundaskítur.  Láttu mig vita hvort þú hafir haft samband við Ólaf.  [e-mail]  héðan er allt gott að frétta.  Sæmilegt veður og mikil vinna.  Ég er að fara að passa Brynhildi Þórey í hádeginu á morgun á saumastofunni.  Við skulum bara vona að það komi ekki neinir viðskiptavinir á meðan, þar sem ég get ekki haldið á henni og tekið síddina á buxum í einu, nema að viðskiptavinurinn haldi á henni á meðan!

Bestu kveðjur.

 Gerður